Category Archives: Fiqh

ரமழானின் பயிற்சியை தொடருவோம்


புனித ரமழான் எம்மை விட்டு இன்னும் ஓரிரு தினங்களில் விடை பெறப் போகின்றது. அது நம்மிடமிருந்து விடை பெற்றாலும் இது ஒரு மாத காலமாக எமக்கு வழங்கிய பயிற்சிகள், படிப்பினைகள் எம்மை விட்டும் மறையக் கூடாது.

அது எமது வாழ்வில் தொடர வேண்டும். புனித ரமழானில் நோன்பு நோற்று, இரவில் தராவீஹ் தொழுது, அல்குர்ஆன் ஓதி ஏனைய சுன்னத்தான, நபிலான வணக்க வழிபாடுகளைக் கொண்டு எமது ரமழானை சிறப்பித்தோம்.

இந்தப் பயிற்சிகள் ஏனைய மாதங்களிலும் நம்மிடம் வரவேண்டும். அதுவின்றி புனித ரமழான் முடிந்த கையோடு அதில் நாம் செய்த அனைத்து அமல்களையும் உதறித் தள்ளிவிடக் கூடாது. ரமழான் முழு வாழ்வுக்குமான பயிற்சியை எமக்கு வழங்கி விட்டுச் செல்கின்றது என்பது தான் உண்மை.

புனித ரமழானை சிறப்பாக கழித்த நாம் நோன்புப் பெருநாள் இரவிலோ, அல்லது பெருநாள் தினத்தன்றோ வீண் களியாட்டங்களிலும் பொழுது போக்குகளிலும் ஈடுபடக் கூடாது. மாறாக அல்லாஹ் வுக்கு பொருத்தமான நல்ல காரியங்களில் இத்தினத்தை கழிக்க வேண்டும்.

ஒரு மாத கால இந்த மாபெரும் ஆத்மீக பயிற்சியின் பேறாக மலரவுள்ள “ஈதுல் பித்ர்” ஒவ்வொரு விசுவாசியும் கடமையை நிறைவேற்றிய களிப்பையும் மகிழ்வையும் வெளிப்படுத்தும் தினமாகவும், இந்த மகத்தான வாய்ப்பை தங்களுக்கு வழங்கிய அல்லாஹ்வுக்கு நன்றி தெரிவிக்கும் தினமாகவும் விளங்குகின்றன. இந்த ஈத் பெருநாள் தொழுகையானது முஸ்லிம்களின் சகோதரக் கட்டுக்கோப்புக்கு வலுவூட்டுகின்றது.

இபாதத்களின் இதயம் போன்றது தொழுகை


சாந்தி மார்க்கமாம் இஸ்லாம் ஐந்து தூண்களால் நிர்மாணிக்கப்பட்டுள்ளது. கலிமா என்ற பிரதான நடுக்கம்பத்தில், தொழுகை, ஸக்காத், நோன்பு, ஹஜ்ஜு எனும் நான்கு தூண்களின் துணை கொண்டு நிலை நிறுத்தப்பட்டிருக்கும் இஸ்லாத்தின் இரண்டாம் கடமையாகிய தொழுகை இபாதத்களின் இதயம் போன்றதாகும். எல்லாமே நீதான் என்று அல்லாஹ்வையும், அவன் தூதர் முகம்மது நபி (ஸல்) அவர்களையும் இதய சுத்தியோடு ஏற்றுக்கொள்ளும் கலிமாவை மொழிதலோடு இஸ்லாமியக் கட்டடத்துள் நுழைந்த எவருக்கும் அடுத்த ஸ்தானத்தில் உள்ள தொழுகை கட்டாய கடமை ஆக்கப்பட்டுள்ளது.
இதில் ஏழை, பணக்காரன் உயர்ந்தவன், தாழ்ந்தவன், அரசன், ஆண்டி என்ற எதுவித வேறுபாடுமின்றி தோளோடு தோள் சேர்ந்து தொழுவதில் யாருக்கும் எப்பாகுபாடும் காட்டப்படுவதில்லை. இந்த மேலான வணக்கம் உத்தம நபி (ஸல்) அவர்களின் விண்ணுலக யாத்திரையின் போது அல்லாஹ்வால் ஐம்பது “வக்தா”க வழங்கப்பட்டு அது உம்மத்தின் நன்மை கருதி ஐந்து நேரத் தொழுகையாக அமானிதப் பொருளாக நம்முன் தரப்பட்டுள்ளது.
மறுமையின் விசாரணைக் கூண்டில் நிறுத்தப்பட்டு ஒவ்வொருவரிடமும் கேட்கப்படும் முதற் கேள்வி தொழுகை பற்றியதாகவே அமையும். இது சீராக அமைந்தால்தான் ஏனைய வணக்கங்களும் சீராக அமையும், இன்றேல், எதிர்மாற்றமான துர்ப்பாக்கிய நிலைக்குள் ஆளாக வேண்டிய துரதிர்ஷ்ட நிலைதான் ஏற்படும்.
இதனால் தான் கண்மணியான நாயகம் (ஸல்) அவர்கள் எனது கண் குளிர்ச்சி தொழுகையில்தான் உள்ளது என நவின்றார்கள். தொழுகைக்கு முன் சுத்தம் எனும் “வுழு” அதன் திறவுகோல் ஆகவும், சொர்க்கத்தைத் திறக்கும் திறவுகோல் தொழுகை எனவும் விதந்துரைக்கப்பட்டுள்ளது சிந்திக்கத்தூண்டுவதாக அமைகிறது.
றசூல் (ஸல்) அவர்கள் கூறியதாக அனஸ் (ரலி) அவர்கள் அறிவிக்கிறார்கள்,
ஒருவர் தொழுகையை அந்தந்த நேரத்தில் நல்லமுறையில் வுழூச் செய்து உள்ளச்சத்துடன் ருகூஉ, நிலை, ஸஜ்தா பேணி தொழுதால் அந்தத் தொழுகை பிரகாசிக்கும் ஒரு சக்தியாக மாறி “நீ, என்னைப் பாதுகாத்ததுபோல் அல்லாஹ் உன்னைப் பாதுகாப்பானாக” என்று அவருக்கு “துஆ” கேட்கிறது.
இதற்கு மாற்றமாக ஒருவர் தொழுகையில் நேரம் தவறியும், நன்றாக வுழுச் செய்யாமலும், உள்ளச்சமில்லாமலும் ருகூஉ, சுஜுது ஆகியவற்றை நல்ல முறையில் பேணாமலும் தொழுது வருவாராயின் அந்தத் தொழுகை இருளடைந்து விகாரமுடையதாக மாறி நீ என்னை வீணாக்கியது போல் அல்லாஹ்வும் உன்னை வீணாக்குவானாக” என்று சாபமிடுகிறது.
பின்னர் அந்தத் தொழுகை பழைய துணியைச் சுருட்டுவதுபோல் சுருட்டப்பட்டு தொழுதவருடைய முகத்தில் வீசி எறியப்படுகிறது. (நூல் தபறானி) இது எவ்வளவு பாரதூரமான எச்சரிக்கை. இதேபோன்று வேண்டாவெறுப்புடன் அலட்சியமாக விட்டு விட்டுத் தொழுபவருக்கு வைல் எனும் நரகம் காத்திருப்பதாக அறிவிப்பும் அபாய வேட்டுக்களாகச் சிந்திக்கத் தூண்டுகின்றன.
மேலும் நபி (ஸல்) அவர்கள் கூறியதாக ஹஸ்ரத் அபூஹுரைரா (ரலி) அவர்கள் மூலமாக முஸ்லிம் என்ற கிரந்தத்தில் பதியப்பட்டுள்ளதாவது; “தொழுகைக்கு முஅத்தினால் பாங்கு சொல்லப்பட்டால் பாங்கு சப்தம் தன் காதில் விழாமலிருக்க சப்தமாக காற்றை வெளியாக்கியவாறு “சைத்தான்” புறமுதுகு காட்டி ஓடிவிடுகிறான். பிறகு பாங்கு சொல்லி முடிக்கப்பட்டதும் திரும்பி வந்து விடுகின்றான். இகாமத் சொல்லப்பட்டால் மீண்டும் ஓடி விடுகிறான்.
இகாமத் சொல்லி முடிக்கப்பட்டதும் தொழுகையாளியின் மனதில் தேவையற்ற ஊசலாட்டத்தைப் போட திரும்பி வந்து விடுகிறான். தொழுகையாளியிடம் இன்ன இன்ன காரியத்தை நினைத்துப் பார் என்று சொல்கிறான் தொழுகையாளிக்கு தொழுகைக்கு முன் நினைவில் இல்லாத காரியங்களையெல்லாம் ஞாபகமூட்டி விடுகிறான்.
இறுதியில் தொழுகையாளிக்கு எத்தனை றக்அத்துகள் தொழுதோம் என்று கூடத் தெரியாமல் போய்விடுகிறது என்பதாகச் சொல்லப்பட்டுள்ளது. இது எவ்வளவு தூரம் உண்மை என்பதை தொழுகையின் மூலம் அனுபவ ரீதியாக அறிந்து கொள்கிறோம் அல்லவா! தொழுகையின்போது அண்ணல் நபி (ஸல்) அவர்களும் அவர்களை அச்சொட்டாகப் பின்பற்றி வாழ்ந்த ஸஹாபாத்தோழர்களும் எவ்வாறு நடந்திருக்கி றார்கள் என்பதற்கு எண்ணில் அடங்காத எத்தனையோ சம்பவங்களை உதாரணத்திற்கு எடுத்துக் கூறலாம். ஆனால் பதச்சோறாக சிலவற்றை இங்கு நோக்கலாம்.
ஆயிஷா (ரலி) அன்ஹா அவர்கள் அறிவிக்கின்றார்கள், றசூல் (ஸல்) அவர்கள் தங்களின் இரு பாதங்களின் இருந்து வெடிப்பு ஏற்படும் அளவில் அதிகம் நின்று தொழுபவர்களாக இருந்தார்கள். அப்பொழுது நான் அவர்களிடம் யாறசூலுல்லாஹ்! தங்களின் முன் பின் பாவங்களை அல்லாஹ் மன்னித்திருந்தும் தாங்கள் ஏன் இவ்வாறு செய்கின்aர்கள்? எனக் கேட்டேன். (தொடரும்)

குடும்பக் கட்டுப்பாடும் கருச்சிதைவும்

கேள்வி: குடும்பக் கட்டப்பாடு, கருச்சிதைவு போன்றன பற்றிய இஸ்லாமிய வரையறைகளை விளக்குவீர்களா?

பதில்: மனித இனம் நிலைபெற வேண்டுமென்பது திருமண அமைப்பின் அடிப்படை நோக்கங்களில் ஒன்றாகும். இனப்பெருக்கத்தின் மூலமே மனித இனம் நிலைக்க முடியும். இஸ்லாம் இனப்பெருக்கத்தை விரும்பி உற்சாகப்படுத்துகின்றது. ஆயினும், ஏற்புடைய நியாயமான காரணங்களுக்காகக் குடும்பக் கட்டுப்பாட்டிற்கு அனுமதி வழங்குகின்றது. நபிகளாரின் காலத்தில் குடும்பக்கட்டுப்பாட்டிற்குரிய வழிமுறையாக அமைந்தது ‘அஸ்ல்’எனும் செயற்பாடாகும். ‘அஸ்ல்’ என்பது ஆண் தனது இந்திரியத்தைப் பெண்ணின் கர்ப்பவறையைப் போய் அடைய விடாது தடுத்துக் கொள்வதைக் குறிக்கும். நபித்தோழர்கள் இம்முறையைக் கையாள்வோராய் இருந்துள்ளனர். ‘அல்குர்ஆன் இறங்கிக் கொண்டிருந்த வேளையில் நாங்கள் ‘அஸ்ல்’ செய்வோராய் இருந்தோம்.’ என ஜாபிர் (ரலி) கூறியுள்ளார். (ஆதாரம் – புஹாரி, முஸ்லிம்)

‘ஒருபோது ஒருவர் நபிகளாரிடம் வந்து ‘அல்லாஹ்வின் தூதரே! எனக்கொரு பெண் இருக்கிறாள். நான் அவளிடத்தில் அஸ்ல் செய்கின்றேன். அவள் கர்ப்பமுறுவதை நான் விரும்பவில்லை. ஆயினும், யூதர்களோ அஸ்ல் என்பது சிறிய கொலையாகும் என்கின்றனர்’ என்றார். இதனைச் செவிமடுத்த நபியவர்கள் ‘யூதர்கள் பொய் கூறுகின்றனர். அல்லாஹ் படைக்க நாடினால் அதனை உம்மால் தடுக்க முடியாது’ (திர்மிதி, நஸாயி, இப்னு மாஜா) எனக் கூறினார்கள். (அதாவது சிலவேளை கணவன் அஸ்ல் செய்யினும், அவன் அறியாதவாறு ஒரு துளி இந்திரியமாவது தவறி, பெண்ணின் கர்ப்பத்தையடைந்து, அவள் கர்ப்பம் தரிக்க இடமுண்டு என்பதாகும்.) ‘அல்லாஹ்வின் தூதர் வாழ்ந்த காலத்தில் நாங்கள் அஸ்ல் செய்வோராயிருந்தோம். இவ்விடயம் நபிகளாருக்கு எட்டியபோது அவர்கள் கூடாது என்று தடை செய்யவில்லை’ என ஜாபிர் (ரலி) அவர்கள் கூறிய மேலும் ஓர் அறிவிப்பு ஸஹீஹ் முஸ்லிமில் பதிவாகியுள்ளது.

மேலும் ஒரு சந்தர்ப்பத்தில் உமர் (ரலி) அவர்களது அவையில் ‘அஸ்ல் பற்றிப் பிரஸ்தாபிக்கப்பட்டது. அங்கு வீற்றிருந்த ஒருவர், ‘அது சிறிய கொலை என நம்பப்படுகிறது’ என்றார். அவ்வேளை அங்கிருந்த அலி (ரலி), ‘அதுகொலையல்ல. அது கொலையாக அமைய (குறித்த கரு) ஏழு கட்டங்களைக் கடந்திருக்க வேண்டும். அவையாவன: களிமண் சத்து, இந்திரியத்துளி, இரத்தக்கட்டி, எலும்புத்தொகுதி, சதையமைப்பு, வேறு (முழு) உருவம்’ என்றார்கள். இதனைக் கேட்ட உமர் (ரலி) ‘அலியே, உண்மை சொன்னீர், அல்லாஹ் உமக்கு நீண்ட ஆயுளை அளிப்பானாக’ எனக் கூறினார்.

குடும்பக் கட்டுப்பாட்டை அனுமதிக்கின்ற நியானமான காரணங்கள்:

1. தாயின் உயிருக்கோ அல்லது உடல் நலனுக்கோ ஆபத்து ஏற்படும் என அனுபவத்தின் வாயிலாகவோ அல்லது நம்பத்தகுந்த ஒரு மருத்துவர் மூலமோ அறிந்தால், குடும்பக்கட்டுபாட்டிற்கு அனுமதியுண்டு. இக்கருத்துக்கு ஆதாரங்களாகக் கீழ்வரும் திருவசனங்களை அறிஞர்கள் குறிப்பிடுவர் அவையாவன:

”உங்களை நீங்கள் அழிவுக்கு உட்படுத்த வேண்டாம்’ (2:195)

‘மேலும் உங்களை நீங்கள் கொலை செய்து கொள்ள வேண்டாம். நிச்சயமாக அல்லாஹ் உங்கள் மீது அதிகம் அன்பு கொண்டவனாய் இருக்கிறான்.’ (4:29)

2. லௌகீக ரீதியில் அமைந்த சங்கடத்தை எதிர்கொள்ள வேண்டிவரும். அது பின்னர் மார்க்க விவகாரங்களையும் பாதிக்கும். தனது குழந்தைகளுக்காக வேண்டி ஹராத்தையோ அல்லது பாவத்தையோ செய்ய வேண்யேற்படுமென்று ஒருவர் அஞ்சும் நிலையிலும் குடும்பக்கட்டுப்பாட்டுக்கு அனுமதியுண்டு.

‘அல்லாஹ் உங்களுக்குச் சங்கடத்தை ஏற்படுத்த விரும்புவதில்லை.’ (5:6)

3. தனது குழந்தைகளின் உடல்நலம் பாதிப்புறுமென்றோ அல்லது அவர்களை முறையாக வளர்ப்பதில் பிரச்சினைகள் தோன்றுமென்றோ அஞ்சுவதற்கு நியாயமான காரணங்கள் இருப்பினும் குறித்த செயற்பாட்டிற்கு அனுமதியுண்டு. உஸாமா (ரலி) அறிவிகின்றார்: ‘ஒருமுறை ஒருவர் ரஸுல் (ஸல்) அவர்களிடம் வந்து ‘அல்லாஹ்வின் தூதரே! நான் எனது மனைவியிடத்தில் அஸ்ல் செய்கின்றேன்’ என்றார். ‘அதற்கு நபிகளார் ‘ஏன் அப்படிச் செய்கின்றீர்?’ என்று வினவ அதற்கு அம்மனிதர் ‘நான் எனது குழந்தையையிட்டு அல்லது குழந்தைகளையிட்டு அஞ்சுகின்றேன்’ என்றார். அதற்கு நபிகளார் ‘அது (அஸ்ல்) தீங்கிழைப்பதாக இருப்பின் பாரசீகத்தையும், ரோமாபுரியையும் பாதித்திருக்கும்’ (அதாவது இத்தகைய தனிமனிதர்களின் நிலைகள் முழுச் சமூகத்தையும் பாதிக்காது. அவ்வாறு இருப்பின் அன்றைய வல்லரசுகளாகத் திகழ்ந்த ரோம, பாரசீகத்தைப் பாதித்திருக்கும் என்பதாகும்.) என்றார்கள்.’

4. பால்குடிக் குழந்தையின் நிலையைக் கருத்திற்கொண்டு, தாய் கருத்தரிப்பதனால் குழந்தைக்குப் பாதிப்பு ஏற்படும் எனக் கருதுவதும் குடும்பக் கட்டுப்பாட்டை நியாயப்படுத்துகின்ற ஒரு காரணமாகும்.

பால் குடிக் குழந்தை இருக்கும் நிலையில் தன் மனைவியுடன் (கருத்தரிக்கும் நோக்கோடு) உடலுறவு கொள்வதனை நபியவர்கள் இரகசியக் கொலை என வர்ணித்துள்ளனர். (ஆயினும், இதனை ஷரீஅத் ஹராம் என முற்றாகத் தடை செய்யவில்லை என்பதனைக் கவனத்திற்கொள்க.)

மேலே குறிப்பிட்ட நியாயமான காரணங்களுக்காகக் குடும்பக் கட்டுப்பாடு செய்வதனை இஸ்லாம் அனுமதித்திருப்பினும், கருச்சிதைவை அது அனுமதிப்பதில்லை. அக்கருவானது ஹராமான முறையில் தரித்திருப்பினும் சரியே, ஒரு கருவை அதற்கு ரூஹ் ஊதப்பட்டதன் பின்னர் சிதைப்பது ஹராமான மாபெரும் குற்றமாகும்.

ஆயினும், குறித்த கருவானது சிதைக்கப்படாது தொடர்ந்து தாயின் வயிற்றில் இருப்பது அவளின் உயிருக்கு ஆபத்தையேற்படுத்தும் என்பது உறுதியாகத் தெரியவரின் இரு தீங்குகளில் ஒன்றைத் தெரிவு செய்ய வேண்டியிருப்பின், அவற்றில் குறைந்ததைத் தெரிவு செய்தல் வேண்டும் எனும் சட்டவிதியின் அடிப்படையில் கருவைச் சிதைப்பதைத் தவிர வேறு வழியே இல்லாத போது அதற்கு அனுமதியுண்டு. ஏனெனில், கருவிலிருக்கும் சிசுவுக்காக வாழுகின்ற தாயை இழக்க முடியாது. அது அறிவுடைமையும் ஆகாது. மேலும், சிசுவானது உருக்குலைந்ததாக இருந்து, பிறந்து வாழும் பாக்கியத்தைப் பெறினும், பெரும் அவஸ்தையுடனேயே வாழும் நிலைக்கு உட்படும் என்பது விஞ்ஞான பூர்வமான உறுதியாகக் கண்டறிய முடியும் நிலையிலும் கருவைச் சிதைக்க ஷரீஅத்தில் இடமுண்டு.