சிந்தனை யுத்தத்தில் செத்துக் கொண்டிருக்கிறோம்

றைநம்பிக்கையாளர்கள் நன்மைகள் செய்ய விரைகின்றனர், முன்னேறிச் செல்கின்றனர். (அல்குர்ஆன் 23:60-61)

கருணை மிக்க இறைவன் மனித குலத்திற்காக என்னிலடங்கா அருட்;கொடைகளை வழங்கியுள்ளான்.
பிள்ளைச் செல்வம், பொருட்செல்வம், பட்டம்-பதவி, நோயற்ற வாழ்க்கை, நகைநட்டுகள், வாகனங்கள் இப்படி ஏராளமான அருட்கொடைகளை இறைவன் வழங்கியுள்ள போதும் அவ்வருட்கொடைகளில் எல்லாம் மிகப் பெரிய அருட்கொடை, விலைமதிப்பற்ற ஒரு செல்வம் தீன். அதாவது இஸ்லாம்.
இத்தீனை நமக்கு வழங்கியுள்ளதால்தான் நாம் முஸ்லிம்கள் என்பதில் பெருமிதம் கொள்கிறோம். இந்த தீனை நிலை நாட்ட ஒரு சமுதாயத்தை புனர்நிர்மாணம் செய்ய ஒரு சமுதாயத்தை முன்னேற்றப் பாதையில் இட்டுச் செல்ல ஒவ்வொரு ஆண் மகனுக்கும் எத்தனை பங்கு உள்ளதோ அதைவிட அதிகமான பங்கு பெண்களுக்கும் உண்டு.

ஏனெனில் இந்த தீனினால் – மார்க்கத்தினால் அதிகம் பயன் அடைந்தவர்கள் பெண்கள், அதிகம் சிறப்படைந்தவர்கள் பெண்கள்.

துரதிஷ்டவசமாக, இன்றைய பெண்கள் இதை உணரத் தவறி தமக்கென வேறு பாதை, வேறு இலட்சியம், வேறு போக்கு, வேறு நோக்கு என வரையறுத்து இந்த தீனை ஆண்களுக்கு மட்டுமே என ஒதுக்கி ஒதுங்கிக் கொண்டனர்.

பெண்கள் ஆழமாகச் சிந்திக்கத் தொடங்கி தம் பொறுப்புக்களை உணர்ந்துக் கொள்ளாத வரையில் எந்தவொரு சமுதாய மாற்றமும் இந்த மண்ணில் நிகழப் போவதில்லை.

இஸ்லாம் தோன்றுவதற்கு முன்னுள்ள காலகட்டத்தை நினைத்துப் பாருங்கள்.

முழு உலகிலும் பெண்களின் நிலை என்னவாக இருந்தது. ஆண் மட்டும் தான் மனிதப் பிறவி, பெண் என்பவள் ஆண்களுக்கு சேவை செய்யப் படைக்கப்பட்ட ஒரு உயிரிணம், விலங்குகள் போலத்தான் பெண்களும் நடாத்தப்பட்டனர்.

பெண்களுக்கு ஆன்மா உண்டா? இல்லையா? என்ற ஆராய்ச்சிகளை மேற்கத்திய நாடுகள் கூட நடாத்த தவறவில்லை.

பெண் குழந்தை பிறப்பதையே அவமானச் சின்னமாக, மானக் கேடாக கருதிய சமுதாயத்தில்,”பெண் என்பவள் மனித குழத்தில் ஓர் அங்கம் ” என்ற புரட்சி கரமான செய்தியை அறிவித்த முதல் மார்க்கம் இஸ்லாம்.

வாரிசுப் பொருட்களோடு பொருளாகக் கருதி பெண்களைப் பங்கீடு செய்துக் கொண்டிருந்த சமுதாயத்தில் வாரிசுச் சொத்தில் பெண்களுக்குப் பங்கு உண்டு என பிரகடனப் படுத்திய முதல் மார்க்கம் இஸ்லாம்.

இது பெண்களை கௌரவித்த மார்க்கம், பெண்களை சிறப்பிக்க வந்த மார்க்கம், பெண்களுக்கு வாழ்வளிக்க வந்த மார்க்கம்.

இந்த உணர்வு, இந்த சிந்தனை இன்றைய இஸ்hலாமியப் பெண்களிடம் மடிந்து, மண்ணோடு மண்ணாக மக்கிப் போய்க் கொண்டுள்ளது.

ஆனால் அன்றைய காலப் பெண்களோ இதை உணர்ந்திருந்தனர். எனவே இஸ்லாத்தை முதன் முதலில் தழுவியது ஒரு பெண். வஹியின் ஆரம்பமே ஒரு பெண்ணின் கதீஜா (ரலி) அவர்களின் துணையோடு துவங்கிற்று. இஸ்லாத்தை முதன் முதலில் தழுவியது ஒரு பெண் என்றால் – இஸ்லாத்திற்காக முதன் முதலில் உயிர்த் தியாகம் செய்ததும் ஒரு பெண்தான். தன் உயிரை ஈந்து தீனை வாழ வைத்தார்கள் அன்னை சுமையா (ரலி) அவர்கள். இன்றைய பெண்களிடம் இந்த உணர்வு இல்லை. இதன் விளைவு சமுதாயத்தில் புற்று நோயாக புரையோடிக் கிடக்கின்றது.

பெண் குழந்தை பிறப்பது சாபக் கேடு, பெண் குழந்தையை வளர்ப்பது பொருளாதாரச் சுமை என்று எண்ணி, பெண்கள் அவமானச் சின்னமாகக் கருதப்பட்ட காலத்தில், எவன் ஒருவன் இரண்டு பெண் குழந்தைகளைப் பெற்று, வளர்த்து ஆளாக்குகிறானோ, அம்மனிதன் மறுமையில் நரகம் செல்லாதவாறு இரண்டு பெண்களும் திரையாக நிற்பார்கள் என பெண்ணை மகள் என்ற நிலையில் கௌரவப்படுத்தியது இஸ்லாம்.

நீங்கள் அவர்களுக்கு ஆடை, அவர்கள் உங்களுக்கு ஆடை என ஆண் பெண் உறவை, பரஸ்பர பாசத்தை, காதலை தனக்கே உரிய அழகிய பாணியில் விளக்கமளித்தது அல்குர்ஆன்.

மனிதர்களே! உங்களில் சிறந்தவர் தம் மனைவியரிடத்தில் சிறந்தவர் என்று மனைவி என்ற நிலையில் கௌரவப்படுத்தியது இஸ்லாம்.

”ஒரு மனிதர் நபிகள் நாயகம் (ஸல்) அவர்களிடம் வினவுகின்றார். நான் முதலில் யாருக்கு கடமைப்பட்டுள்ளேன்? உன் தாய்க்கு, இரண்டாவதாக? உன் தாய்க்கு, மூன்றாவதாக? உன் தாய்க்கு, நான்காவதாக? உன் தந்தைக்கு. ஆம்: முதல் மூன்று நிலைகள் தாய்க்கு. நான்காவது நிலைதான் தந்தைக்கு. ஒரு குழந்தையை தாய் கருவில் சுமப்பது முதல் நிலை, பிரசவிப்பது இரண்டாவது நிலை, பாலூட்டுவது மூன்றாவது நிலை, அக்குழந்தையை வளர்க்கும் நான்காவது நிலையில் தான் தந்தை வருகின்றார். இதை உணர்ந்து முதல் மூன்று நிலைகளைத் தாய்க்கு கொடுத்து தாய் என்ற நிலையில் பெண்ணை கௌரவப் படுத்தியுள்ளது இஸ்லாம்.”

இவ்வாறு பெண்களை மகளாக, தாயாக, மனைவியாக, சகோதரியாக என எல்லா நிலையிலும் கௌரவப் படுத்தியுள்ள ஒரே மார்க்கம் இஸ்லாம் மட்டுமே. இந்த தீன் மட்டுமே.

இந்த மார்க்க அறிவு இல்லாமல் சுதந்திரம் வேண்டும் என நாகரிகத்தின் பின்னால் ஓடுகின்றோம். கையில் நெய்யை வைத்துக் கொண்டு வெண்ணெய் தேடி அலைகிறோம்.

ஆணுக்கும் பெண்ணுக்கும் சமவாய்ப்பு என்ற பெயரில் பெண்ணினத்தை ஏமாற்றி வருகின்றது இந்த நவநாகரிகம்.

ஆண்களின் சிற்றின்ப ஆர்வத்தை தூண்டும் போதைப் பொருளாக மட்டுமே பெண்கபை; பயன்படுத்துகின்றது இன்றைய நாகரிகம்.

டயர் விளம்பரமா? அரைகுறை ஆடையில் பெண்கள்.

பற்பசை விளம்பரமா பெண்கள். மீண்டும் அந்த அறியாமைக் கால மூட பழக்க வழக்கங்களை, அந்தப் பழைய ரசத்தையே புதிய போத்தலில் புகட்டுகின்றது இன்றைய நாகரிகம்.

பெண்களை மாணிக்கங்களாகப் பாதுகாக்கும் இஸ்லாத்தை விட்டு விட்டு, பெண்மையைக் கருங்கல், செங்கல் ஆக வீதி தோறும் இறைக்கும் நாகரிகத்தின் பின்னால் ஓடிக்கொண்டிருக்கிறோம்.

நாலு பெண்கள் சேர்;ந்தால் அவர்களின் பேச்சு எதை நோக்கி உள்ளது? புடவை? பூ? சில சமயல் குறிப்புகள்? தொலைக்காட்சிப் பெட்டியில் வரும் மெகா தொடர்கள்? நகை? இவைதான் வாழ்க்கையா? என்றாவது மார்க்க சிந்தனையைப் பேசி இருக்கிறார்களா? மறுமையைப் பற்றி நினைக்கின்றார்களா?

என்மகன் நோயற்ற வாழ்வு வாழவேண்டும், அதிகம் அதிகம் சம்பாதிக்க வேண்டும். என் மகள் சுகபோக வாழ்க்கை அனுபவிக்க வேண்டும் என்று ஏங்கும், கலங்கும் தாய்மார்கள் நிறைய

எந்த தாயாவது என் மகளை, மகனை மறுமையில் நரக நெருப்பு தீண்டாமல் இருக்க வேண்டுமே என்று கவலைப்பட்டதுண்டா?

அற்பமான இவ்வுலக வாழ்க்கைக்காக கண்ணீர் சிந்தும் கண்கள் நிலையான மறுமை வாழ்வுக்காக கலங்கியதுண்டா என்றால் இல்லை.

இரண்டு வகையான யுத்தங்கள் உண்டு, ஒன்று இராணுவ யுத்தம். இது நமக்குத் தெரியும். மற்றொன்று சிந்தனை யுத்தம், கத்தியின்றி இரத்தமின்றி நடக்கும் இந்த சிந்தனை யுத்தத்தில் நாம் நாள்தோறும் மடிந்து கொண்டிருக்கின்றோம். தொலைக்காட்சி, இணையதளம், செய்தித்தாள்கள் வாயிலாக நம்மூளை தினம் தோறும் சலவைச் செய்யப்பட்டு அல்லாஹ்வை விட்டு விலகிக் கொண்டிருக்கின்றோம்.

சகோதரிகளே! விழித்தெழுங்கள்! அல்லாஹ்வின் பக்கம், அல்லாஹ்வின் பாதையில் விரைந்து வாருங்கள். அல்லாஹ்வின் பாதையில் முதல் கட்டம் தவ்பா செய்வது. தவ்பா என்றால் யா அல்லாஹ்! எங்களை மன்னித்து விடு என்று வாயால் மொழிவது அல்ல, நம் செயலில் காட்ட வேண்டும்.

ஷைத்தானியப் பாதையை விட்டு விலகி, அல்லாஹவின் பாதையில் திரும்புவதுதான் தவ்பா.

இந்த முதல் கட்டம் நிறைவேறினால், அடுத்து இரண்;டாவது கட்டம் பேணுதலாக இருப்பது இறைவனின் பாதையில் தவ்பா செய்து மீண்டு விட்டோம். இனி எந்தச் சூழ்நிலையிலும் இப்பாதையை விட்டு விலகக் கூடாது என்று பேணுதலாக இருக்க வேண்டும்.

மூன்றாவது கட்டம்: பற்றற்ற நிலை. ஹலாலான விஷயங்களை மட்டும் தேர்ந்தெடுப்பது. நாம் வாழ்வின் இலாப நஷ்டங்களை இறைவனுக்காகப் பொறுத்துக் கொள்வது. இறைவனுக்காக நாம் தியாகம் செய்யும் போதுதான், நம் வாழ்க்கை பரக்கத் (அருள்வளம்) நிறைந்நததாக அமையும்.

நான்காவது கட்டத்தில் அல்லாஹ்வின் மீது பேரன்பும், பாசமும் செலுத்துவது. இதை முழுமையாக நிறைவேற்றினால் ஐந்தாவது கட்டமான இறைவனின் திருப்தி நமக்கு கிடைக்கும்.

இந்த ஆன்மீகப் பாதையில் இறைவனின் திருப்தியை நம் இலட்சியமாகக் கொண்டு நம் வாழ்க்கையை, சமுதாயத்தை மாற்றி அமைப்போம். இம்மை, மறுமை இரண்டிலும் வெற்றி பெறுவோம். இன்ஷா அல்லாஹ்…

Posted in SRI LANKA, இஸ்லாம் - islam | Leave a comment

கண்ணையும் கண் பார்வையையும் தந்த அல்லாஹ்வை

கண்ணையும் கண் பார்வையையும் தந்த அல்லாஹ்வை கண் விழித்திருக்கும் நேரமெல்லாம் புகழ வேண்டும். வாயால் மட்டுமல்ல… கண்களாலேயே அந்த அருளுக்கான காணிக்கைகளை நாம் செலுத்த வேண்டும்.
விண்ணிலும் மண்ணிலும் இருக்கின்ற அற்புதங்களையும் அரிய பல காட்சிகளையும் இயற்கையின் ஆர்ப்பரிப்புகளையும் கண்டுகளிப்பதற்கு இந்தப் பார்வை கிடைத்திருக்காவிட்டால் உலகம் இருந்தென்ன பயன்? இருள் மண்டிக் கிடக்கும் ஒரு குகைக்கும் இந்த உலகிற்கும் அப்போது என்ன வித்தியாசம்?!
இருப்பினும் கண்களைத் தந்தவனை கண்ணிமைக்கும் நேரமாவது நினைத்துப் பார்க்காதவர்களும் உலகில் இருக்கத்தான் செய்கிறார்கள். அவர்களுக்கு என்ன நடந்தது? அவர்கள் குருடாகி விட்டார்களா? அவர்களுக்கு நடந்த கதியை அல்குர்ஆனின் 22: 46 ஆவது வசனம் மிகவும் வேதனைதோடு இப்படி எடுத்தியம்புகிறது.
அவர்கள் பூமியில் சென்று (அதிசயமான அல்லாஹ்வின் அத்தாட்சிகளைப் பார்த்து) வர வேண்டாமா? அவ்வாறாயின் சிந்தித்துணரும் இதயங்கள் அவர்களிடம் இருக்க முடியும். செவிமடுக்கும் காதுகளும் (அவர்களிடம்) இருக்க முடியும். நிச்சயமாக பார்வைகள் குருடாவதில்லை. நெஞ்சுக்குள் இருக்கும் (உணர்வற்ற) இதயங்களே குருடாகின்றன.
ஆம், மனிதர்களைப் பொறுத்தவரை குருடாவது பார்வைகளல்ல, பார்த்தவற்றிலிருந்து படிப்பினை பெறாத உள்ளங்களே…

Posted in இஸ்லாம் - islam | Leave a comment

முஹர்ரம் மாதமும் ஆஷூரா நோன்பின் சிறப்பும்!

முஹர்ரம் மாதமும் ஆஷூரா நோன்பின் சிறப்பும்!
بسم الله الرحمن الرحيم
அல்லாஹ் உலகத்தை படைத்து மனிதர்களுக்கு காலங்களை கணித்துக் கொள்வதற்காக பன்னிரண்டு மாதங்களாக ஆக்கினான். இந்த மாதங்களில் சில மாதங்களை சிலதை விட்டும், சில நாட்களை சிலதை விட்டும், மேலும் சில நேரங்களை சிலதை விட்டும் வணக்க வழிபாடுகள் மூலம் சிறப்பாக்கினான். இதன் மூலம் மனிதன் அதிகம் நற்செயல்கள் செய்யவேண்டும் என்பதும் அவனது அந்தஸ்து நற்செயல்களால் உயர்த்தப்பட வேண்டும் என்பதும் ஒரே நோக்காகும். இத்தகைய சிறப்பான மாதங்களில் முஹர்ரம் மாதமும் ஒன்றாகும்.

புனிதமான மாதங்களில் ஒரு மாதம்:

அல்லாஹ் அல்குர்-ஆனில் குறிப்பிட்டு கூறும் புனிதமான நான்கு மாதங்களில் ஒரு மாதம் முஹர்ரம் மாதமாகும் அல்லாஹ் கூறுகின்றான்.

“அல்லாஹ்விடம் நிச்சயமாக மாதங்களின் எண்ணிக்கை, வானங்கள் மற்றும் பூமியைப் படைத்த நாள் முதல் அல்லாஹ்வின் பதிவேட்டில் பன்னிரண்டு மாதங்களாகும். அவற்றில் நான்கு புனிதமானவையாகும். இதுதான் நேரான மார்க்கம். இவைகளில் (போர் செய்து) உங்களுக்கு நீங்களே அநியாயம் செய்து கொள்ளாதீர்கள். இணைவைப்போர் உங்கள் அனைவருடனும் போர் புரிவது போன்று நீங்களும் அவர்கள் அனைவருடனும் போர் புரியுங்கள். நிச்சயமாக அல்லாஹ் பயபக்த்தியாளர்களுடன் இருக்கின்றான் என்பதனை நீங்கள் அறிந்து கொள்ளுங்கள்” (அல்குர் 09:36)

நபி (ஸல்) அவர்கள் கூறினார்கள்:

“வானங்களையும் பூமியையும் படைத்தது முதல் காலம் சுழன்று கொண்டிருக்கின்றது. ஒரு வருடத்தில் பன்னிரண்டு மாதங்கள் உள்ளன. அவற்றில் நான்கு புனிதமானவையாகும். அதிலும் மூன்று மாதங்கள் தொடர்ச்சியாக வருகின்ற துல் கஃதா, துல் ஹிஜ்ஜா, முஹர்ரம் மாதங்களாகும். அடுத்தது ஜமாதுல் ஊலாவுக்கும் ஷஃபானுக்கும் மத்தியில் இருக்கின்ற ரஜப் மாதமும் ஆகும்” (ஆதாரம்: புகாரி)

மேற்குறிப்பிடப்பட்ட ஆதாரங்கள், புனிதமான மாதங்கள் நான்கு என்பதனை தெளிவு படுத்துகின்றது. அவை:

1) துல் கஃதா,
2) துல் ஹிஜ்ஜா,
3) முஹர்ரம்,
4) ரஜப்

எனப்படும் மாதங்களாகும். இம்மாதங்களுக்கு இருக்கக்கூடிய புனிதத்துவத்தை நாம் பாதுகாக்க வேண்டும். இம்மாதங்களில் பேணவேண்டிய சில ஒழுங்கு முறைகளை இஸ்லாம் நமக்கு தெளிவுபடுத்தி தருகின்றது. ஹுரும் என்ற அரபுச்சொல் தடுக்கப்பட்டவை, புனிதம் என்ற பொருள்களை உள்ளடக்கி இருக்கின்றன.

உதாரணமாக, ‘ஹராம்’ என்பதற்கு ‘தடுக்கப்பட்டவை’ என்ற பொருளாகும். ‘தக்பீரதுல் இஹ்ராம்’ என்பது தொழுகையில் முதல் தக்பீரை குறிக்கின்றது. முதல் தக்பீர் கட்டியதிலிருந்து ஸலாம் கொடுக்கும் வரை ஹலாலாக்கப்பட்ட விடயங்கள் தடுக்கப்பட்டிருப்பதால் அதனை இவ்வாறு கூறப்படும். இதே போன்றுதான் ஹஜ், உம்ராவின் போது அணியும் ‘இஹ்ராமும்’ ஆகும். ‘இஹ்ராம்’ என்பதும் ‘தடுக்கப்பட்வை’ எனும் கருத்தில் வந்துள்ளது. இஹ்ராம் அணிந்ததிலிருந்து அதை அகற்றும் வரை சில விடயங்கள் தடுக்கப்பட்டுள்ளதே அதற்குக் காரணமாகும். இவை அனைத்தும் ‘ஹுரும்’ என்ற அடிப்படை சொல்லிலிருந்து வந்தவையாகும். எனவே ‘ஹுரும்’ என்பது ‘தடுக்கப்பட்டவை’ அல்லது ‘புனிதமானவை’ என்று விளங்க முடியும்.

அல்லாஹ் கூறுகின்றான்:

“அல்லாஹ் புனிதப்படுத்தியவைகளை, யார் கண்ணியப்படுத்துகின்றாரோ அதுவே அவரது இரட்சகனிடத்தில் அவருக்கு மிகச் சிறந்ததாகும்” (அல்குர்-ஆன் 22:30)

மனிதன் தடுக்கப்பட்ட விடயங்களிலிருந்து முற்றுமுழுதாக தவிர்ந்து கொள்ள வேண்டும். குறிப்பாக புனிதமான மாதங்களாகிய இம்மாதங்களில் பேணுதலாகாவே இருக்க வேண்டும். எவ்வாறு ஹரத்தின் எல்லைகளின் புனிதத்துவத்தை மீறி பாவம் செய்தால் பன்மடங்கு பாவம் கிடைக்குமோ அதே போன்று புனிதமான இம்மாதங்களில் பாவம் செய்வதென்பது பன்மடங்கு பாவங்களை ஈட்டித்தரும். அதே போன்று இம்மாதங்களில் நன்மை செய்வது பல மடங்கு நன்மைகளையும் ஈட்டித்தரும்.

இம்மாதங்களில் போர் செய்வது தடுக்கப்பட்டுள்ளது. ஆனாலும் இறை நிராகரிப்பாளர்கள் போரை முதலில் ஆரம்பித்தால் அதனை தடுப்பதற்காக வேண்டி முஸ்லிம்களும் போர் புரியலாம். இந்த புனிதத்தன்மை, பொதுவாக முஹர்ரம் மாதம் உட்பட ஏனைய மூன்று மாதங்களுக்கும் பொதுவானவையாகும். இவ்வாறு ஒவ்வொரு புனித மாதத்திற்கும் தனிச்சிறப்புக்கள் உள்ளன. அவற்றில் முஹர்ரம் மாததின் சிறப்புக்களை கீழ் குறிப்பிடும் தகவல்களூடாக அறிந்துகொள்ளலாம்.

அரபு வருட கணிப்பீட்டின் முதல் மாதம்!

முஸ்லிம்களின் வருடக் கணிப்பீட்டில் முதல் மாதம் முஹர்ரம் மாதமாகும். உமர் (ரழி) அவர்கள் தனது ஆட்சிக் காலத்தில் நபித்தோழர்களை ஒன்று சேர்த்து எப்பொழுது முதல் இஸ்லாமிய வருடம் ஆரம்பிக்கப்பட வேண்டும் என்று ஆலோசனை கேட்டார்கள். இதனடிப்படையில் பலரும் பல மாதங்களை குறிப்பிட்டார்கள். இறுதியில் முஸ்லிம்களின் முதல் மாதமாக முஹர்ரம் மாதத்தையும் வருடம் ஆரம்பிப்பது நபிகளார் மக்காவிலிருந்து மதீனாவுக்கு ஹிஜ்ரத் சென்ற நாள் என்றும் முடிவெடுத்தார்கள்.

நபி மூஸா (அலை) அவர்களை பிர்ஃஅவ்னிடமிருந்து காப்பாற்றிய மாதம்!

அல்லாஹ் நபி மூஸா (அலை) அவர்களை கொடுங்கோல் ஆட்சியாளனாகிய ஃபிர்அவ்னிடமிருந்து காப்பாறியது முஹர்ரம் மாதத்தில்தான். இமாதத்தில் ஏராளமான நிகழ்வுகள் நிகழ்ந்துள்ளன.

நபி (ஸல்) அவர்கள் மதீனாவுக்கு வந்தபோது யூதர்கள் ஆஷூரா தினத்தில் நோன்பு நோற்பதை கண்டார்கள். நபியவர்கள் அவர்களிடத்தில் நீங்கள் நோற்கின்ற இந்த நோன்பு எந்த நாள் என்று வினவினார். அதற்கு அவர்கள், “இது ஒரு புனிதமான நாளாகும்; இதில் அல்லாஹ் மூஸா (அலை) அவர்களையும் அவர்களது சமுதாயத்தினரையும் ஃபிர்அவ்னிடமிருந்து காப்பாற்றினான்; மேலும் ஃபிர்அவ்னையும் அவனது கூட்டத்தினரையும் கடலிலே மூழ்கடித்தான். இதனால் மூஸா (அலை), அல்லாஹ்வுக்கு நன்றி செலுத்தும் முகமாக அந்நாளில் நோன்பு நோற்றார்கள். ஆகையால் நாங்களும் நோன்பு நோற்கின்றோம்” என்றார்கள். நபி (ஸல்) அவர்கள் கூறினார்கள்: மூஸாவை பின்பற்றுவதற்கு உங்களை விட நாமே தகுதியானவர்கள் என்று கூறி, நபி (ஸல்) அவர்களும் நோன்பு நோற்று பிறரையும் நோன்பு நோற்க ஏவினார்கள்” (ஆதாரம்: :புகாரி, முஸ்லிம்),

முஹர்ரம் மாதத்தில் நோற்கும் நோன்பின் சிறப்பு!

நபி (ஸல்) அவர்கள் கூறினார்கள்:

“ரமழான் மாத நோன்புக்கு பின் சிறந்த நோன்பு முஹர்ரம் மாத நோன்பாகும். கடமையான தொழுகைக்குப் பின் சிறந்த தொழுகை இரவுத் தொழுகையாகும்” (ஆதாரம்: முஸ்லிம்)

இந்த ஹதீஸில் முஹர்ரம் மாதத்தில் நோற்கின்ற சுன்னத்தான உபரியான நோன்புகளுக்கு பல நன்மைகள் உள்ளன என்பதனை “ரமழானுக்கு பின்னர் சிறந்த நோன்பு முஹர்ரம் மாதத்தில் நோற்கும் நோன்பு” என்ற வரிகளின் மூலம் விளங்கக் கிடைக்கின்றது, இதனால் வாராந்திர நோற்கக்கூடிய திங்கள், வியாழன் நோன்புகள், அதே போன்று மாதாந்திரம் நோற்கக்கூடிய 13,14,15 அய்யாமுல் பீழ் (வெள்ளை தினங்கள்), அதேபோன்று அய்யாமுஸ்ஸூத் (கருப்புத்தினங்கள்) 27.28,29 நோற்கக்கூடிய நோன்புகளை நோற்று நபி (ஸல்) அவர்கள் ரமழானுக்குப் பின்னர் சிறந்த நோன்பு என்று சொல்லப்பட்ட சிறப்பைபெற முயலவேண்டும்.

முஹர்ரம் மாதத்தில் நோற்கும் ஆஷூரா நோன்பின் சிறப்பு!

முஹர்ரம் மாதத்தில் நபிகளார் செய்துவந்த, ஏவியவற்றில் ஆஷூரா நோன்பு முக்கியமானதாகும். ஆஷூரா என்பது பிறை கணிப்பீட்டின்படி முஹர்ரம் மாதத்தின் பத்தாவது நாளாகும், நபிகளார் (ஸல் மதீனாவுக்கு ஹிஜ்ரத் செல்வதற்கு முன்னர் மக்காவில் முஹர்ரம் மாத பத்தாவது நாள் ஆஷூரா நோன்பு நோற்று வந்தார்கள்.

குரைஷிகள் (மக்காவில்) ஆஷூரா நோன்பை நோற்று வந்தார்கள், அதனை நபிகளாரும் நோற்று வந்தார்கள்.. மதீனாவுக்கு ஹிஜ்ரத் வந்தபோது அதனை நோற்குமாறு கட்டளையிட்டார்கள். ரமழான் நோன்பு கடமையாக்கப்பட்டதும் அதனை விரும்பியவர்கள் நோற்கலாம் விரும்பியவர்கள் விடலாம் என்றார்கள். (ஆதாரம்: புகாரி)

இந்த ஹதீஸ் ரமழானுக்கு முன்னர் கடமையாக்கப்பட்ட நோன்பு முஹர்ரம் மாத ஆஷூரா நோன்பு என்பதனையும், ரமழான் நோன்பு கடமையாக்கப்பட்டதும் ஆஷூரா நோன்பை விரும்பியவர்கள் நோற்கலாம் என்பதனையும் தொளிவுபடுத்துகின்றது.

பல உபரியான வணக்கங்களுக்கு இஸ்லாம் சில சிறப்புக்களை வைத்திருப்பதை போன்று ஆஷூரா நோன்புக்கு இருக்கக்கூடிய சிறப்பையும் நபிகளார் கூறியிருக்கின்றார்கள். இன்னாளில் நோன்பு நோற்பது முந்தைய வருடத்தின் பாவங்களுக்கு பரிகாரமாக அமையுமென்று நபி (ஸல்) அவர்கள் கூறியிருக்கின்றார்கள்.

நபி (ஸல்) அவர்கள் கூறினார்கள்:

“ஆஷூரா நோன்பு அதற்கு முந்தைய வருடத்தின் பாவங்களுக்கு பரிகாரமாக அமையும் என்று நான் கருதுகின்றேன்”. (ஆதாரம்: முஸ்லிம்)

முந்தைய வருடத்தின் பாவங்களுக்கு பரிகாரமாக அமையும் என்பதன் பொருள் சிறு பாவங்களையே இங்கு குறிக்கின்றது. மாறாக பெரும் பாவம் செய்தவர்களுக்கு அவர்களது குற்றங்களுக்கு பரிகாரமாக அமைவது தெளபாவாகும்.

முஸ்லிம்கள் அனைத்து விடயங்களிலும் யூதர்களுக்கு மாற்றமாக தங்களது நடவடிக்கைகளை ஆக்கிக்கொள்ள வேண்டும் என்பதனையே இஸ்லாம் வலியுறுத்துகின்றது. யூதர்களும் ஆஷூரா நோன்பை நோற்று வந்ததனால் அவர்களுக்கு மாற்றமாக ஒன்பதாவது நாளும் நோற்கவேண்டும் என்று நபிகளார் கூறியிருக்கின்றார்.

நபி (ஸல்) அவர்கள் கூறினார்கள்:

“வருகின்ற வருடம் நான் இருந்தால் ஒன்பதாவது நாளும் நோன்பு நோற்பேன்” (ஆதாரம்: முஸ்லிம்)

ஆஷூரா நோன்பை நபிகளார் நோற்று வந்தார்கள்; அத்தோடு யூதர்களுக்கு மாற்றம் செய்வதற்காக வேண்டி மதீனாவுக்கு வந்ததன் பின்னர் ஒன்பதாவது நாளும் நோன்பு நோற்க வேண்டும் என்று கூறினார்கள். இதனடிப்படையில் பத்தாவது நாளோடு ஒன்பதாவது நாளும் சேர்த்து நோன்பு நோற்பதே சிறந்ததாகும். இதற்கே அதிகமான ஆதாரங்களும் உள்ளன. முடியாவிட்டால் பத்தாவது, பதினொறாவது நாட்களுமாக நோன்பு நோற்பது யூதர்களுக்கு மாற்றமாக செய்கின்ற செயலாக மாறும். இவ்விரு முறைகளிலும் ஒருவருக்கு நோன்பு நோற்க முடியாவிட்டால் பத்தாவது நாள் மாத்திரமாவது நோன்பு நோற்றுக் கொள்ள வேண்டும்.

வல்ல அல்லாஹ் புனிதப்படுத்திய இம்மாதத்தின் புனிதத் தன்மையை பேணி, இம்மாதத்தில் அதிகமதிக நன்மைகளை செய்து, சுன்னத்தான நோன்பாகிய ஆஷூரா நோன்பையும் நோற்று நபிகளார் கூறிய நற்கூலியை அடைய நம் அனைவருக்கும் அருள் புரிவானாகவும்.

Posted in இஸ்லாம் - islam, பொது அறிவு | Leave a comment